ممبئی: مایہ ناز بھارتی گلوکار گرو رندھاوا نے پاکستان آنے کی خواہش کا اظہار کر دیا۔ ان کا کہنا ہے کہ اپنی ٹیم کے ساتھ مل کر پاکستان کا دورہ کرنے کا سوچ رہا ہوں ۔
ایک انٹریو میں بھارتی گلوکار سے سپر ہٹ گانے ”لاہور دی “ سے متعلق سوال کیا گیاکہ کیا آپ کبھی لاہور گئے ہیں؟ جس پر گلوکار نے کہا کہ نہیں کبھی گئے تو نہیں البتہ اگر وہاں سے بلایا گیا تو ضرور جاوں گا جبکہ میں خود اپنی ٹیم کے ساتھ مل کرپاکستان کا دورہ کرنے کا سوچ رہا ہوں، جس میں لاہور کا تو پتہ نہیں البتہ، اسلام آباد، کراچی اور راولپنڈی ضرور جاوں گا۔
گرو رندھاوا کا کہنا تھا کہ موسیقی کے ذریعے ہم دونوں ممالک کے عوام کو قریب لاسکتے ہیں اور اس سے ہماری درمیان کی دوریاں ختم ہوسکتی ہیں کیوں کہ موسیقی براہ راست دل کو چھوتی ہے اور اس میں یہ نہیں دیکھا جاتا کہ یہ کس جگہ سے گایا جارہا ہے۔
واضح رہے کہ گرو رندھاوا کا شمار بھارت کے مایہ ناز گلوکاروں میں ہوتا ہے ، انہوں نے بالی ووڈ میں ہائی ریٹڈ گبرو، بن جا تو میری رانی اور سوٹ سوٹ جیسے گانوں سے مقبولیت حاصل کی جبکہ انہیں اپنے مشہور گانے ”لگ دی لاہور دی “کی وجہ سے پاکستان میں بھی بے پناہ مقبولیت ملی۔
