منیلا: فلپائن کے ایک گنجان آباد علاقے نے ڈینگی کی وبا کے بڑھتے ہوئے کیسز کو روکنے کے لیے مچھروں کے شکار پر نقد انعام دینے کا اعلان کیا ہے۔
برانگے ایڈیشن ہلز کے چیف کارلیٹو سرنال نے کہا کہ ہر 5 مچھروں کے بدلے ایک پیسو (تقریباً 2 امریکی سینٹ) انعام دیا جائے گا۔ اس اقدام کا مقصد مقامی سطح پر مچھروں کی تعداد کو کم کرنا اور ڈینگی جیسے موذی مرض کی روک تھام کرنا ہے۔
یہ پروگرام کم از کم ایک ماہ تک جاری رہے گا، اور انعام مردہ یا زندہ مچھروں اور ان کے لاروا دونوں پر دیا جائے گا۔ زندہ مچھروں کو الٹرا وائلٹ لائٹ کے ذریعے ہلاک کیا جائے گا، جس سے صحت کے خطرات سے بچا جا سکے گا۔
اب تک 21 افراد 700 مچھروں اور لاروا کے ساتھ انعام حاصل کر چکے ہیں۔ حکام کا کہنا ہے کہ یہ قدم مقامی کمیونٹی کی صحت کی حفاظت کے لیے انتہائی ضروری ہے، اور وہ اسے کامیاب بنانے کے لیے اپنی تمام تر کوششیں جاری رکھیں گے۔
سوشل میڈیا پر اس اعلان کے بعد طنزیہ تبصرے بھی سامنے آئے ہیں، ایک صارف نے کہا، "اب مچھروں کی فارمنگ شروع ہوگی!"، جبکہ دوسرے نے پوچھا، "کیا ایک پر والا مچھر بھی قابل قبول ہوگا یا مسترد کر دیا جائے گا؟"
فلپائن کے محکمہ صحت نے اس اقدام پر تبصرہ کرتے ہوئے کہا کہ وہ مقامی حکومت کے ڈینگی کے خلاف اقدامات کی تعریف کرتے ہیں اور ان کی حمایت کرتے ہیں۔ حکام نے عوام سے مزید تعاون کی اپیل کی ہے تاکہ اس پروگرام کے ذریعے ڈینگی کے کیسز میں کمی لائی جا سکے۔
