ریاض : سعودی عرب کے شہر ریاض میں وفاقی وزیر اطلاعات عطا تارڑ اور بحرین کے وزیر برائے اطلاعات رمضان بن عبداللہ النعیمی کے درمیان اہم ملاقات ہوئی۔ دونوں رہنماؤں نے دوطرفہ میڈیا تعاون کو مزید وسعت دینے، مہارتوں کے تبادلے اور مشترکہ منصوبوں کے فروغ کے عزم کا اظہار کیا۔
ملاقات کے دوران وفاقی وزیر عطا تارڑ نے کہا کہ پاکستان اور بحرین کے تعلقات مضبوط اور مشترکہ عقیدے، تاریخ اور ثقافت پر مبنی ہیں۔ انہوں نے میڈیا کے شعبے میں روابط کو مزید مستحکم کرنے کے لیے میڈیا وفود کے تبادلے کی اہمیت پر زور دیا۔ عطا تارڑ نے بحرین اور پاکستان کے اسٹیٹ میڈیا اداروں کے درمیان تعاون کے فروغ کی ضرورت پر بھی بات کی اور بحرین کی نیوز ایجنسی بی این اے اور پاکستان کی سرکاری نیوز ایجنسی اے پی پی کے درمیان خبروں کے اشتراک کی تجویز دی۔
دونوں رہنماؤں نے حالیہ برسوں میں اعلیٰ سطح کے وفود کے باقاعدہ تبادلوں کا خیرمقدم کیا۔ وفاقی وزیر اطلاعات نے مزید کہا کہ بحرین کا پارلیمانی وفد اس وقت پاکستان کے دورے پر ہے اور آج بحرین کے پارلیمانی وفد کی وزیراعظم پاکستان محمد شہباز شریف سے اہم ملاقات ہوئی، جس میں پاکستان کی معیشت کی ترقی اور عالمی سرمایہ کاری کے مواقع پر گفتگو کی گئی۔
بحرینی وزیر اطلاعات نے کہا کہ بحرین پاکستان کے ساتھ اپنے تعلقات کو قدر کی نگاہ سے دیکھتا ہے اور دونوں ممالک کے تعلقات مختلف شعبوں میں مسلسل مضبوط ہو رہے ہیں۔ انہوں نے میڈیا کے شعبے میں تعاون کو مزید مستحکم کرنے اور مشترکہ کامیابیوں کو فروغ دینے کے لیے بحرین کے عزم کا اعادہ کیا۔
