پشاور: ارباب نیاز کرکٹ سٹیڈیم کے تعمیر نو کے منصوبے میں تاخیر کے باعث لاگت میں مزید ایک ارب روپے کا اضافہ ہوگیا ہے۔ محکمہ کھیل کی جانب سے وزیر اعلیٰ خیبرپختونخوا کو بھیجی گئی سمری میں انکشاف کیا گیا ہے کہ سات سال گزرنے کے باوجود سٹیڈیم کی تعمیر نو مکمل نہیں ہو سکی۔
دستاویزات کے مطابق، ارباب نیاز کرکٹ سٹیڈیم کے تعمیر نو کا کام 2018 میں شروع کیا گیا تھا، اور اس وقت اس منصوبے کا تخمینہ لاگت ایک ارب 37 کروڑ روپے تھا۔ تاہم، 2021 میں اس منصوبے کی لاگت بڑھ کر ایک ارب 94 کروڑ روپے تک پہنچ گئی، اور 2024 میں یہ لاگت تیسری دفعہ بڑھا کر 2 ارب 31 کروڑ روپے کر دی گئی ہے۔
