اسلام آباد: محکمہ موسمیات نے بلوچستان کے مختلف علاقوں میں بارش اور برفباری کی پیشگوئی کی ہے۔ ملک کے بیشتر اضلاع میں موسم سرد اور خشک رہنے کی توقع ہے، تاہم شمال مشرقی پنجاب میں ہلکی سے درمیانی دھند کا امکان ظاہر کیا گیا ہے۔
اسلام آباد اور اس کے گرد و نواح میں بھی موسم سرد اور خشک رہے گا۔ بلوچستان کے بیشتر اضلاع میں موسم سرد اور خشک رہنے کے باوجود کوئٹہ، زیارت، قلات، موسیٰ خیل، قلعہ عبداللہ، پشین، خاران اور گرد و نواح میں تیز ہواؤں اور گرج چمک کے ساتھ بارش اور برفباری کا امکان ہے۔
پنجاب کے بیشتر اضلاع میں بھی موسم سرد اور خشک رہے گا، تاہم مری، گلیات اور گرد و نواح میں جزوی ابر آلود موسم اور شدید سردی کی پیشگوئی کی گئی ہے۔ خیبرپختونخوا کے بیشتر اضلاع میں موسم سرد اور خشک رہنے کے علاوہ بالائی اضلاع میں شدید سرد موسم کی توقع ہے۔ کشمیر اور گلگت بلتستان میں بھی موسم شدید سرد اور جزوی ابر آلود رہنے کی پیشگوئی کی گئی ہے۔
