لاہور: جمعیت علمائے اسلام (جے یو آئی) کے سربراہ مولانا فضل الرحمان اور جماعت اسلامی کے امیر حافظ نعیم الرحمان نے "اتحاد امت" کے نام سے ایک نیا سیاسی پلیٹ فارم تشکیل دینے کا اعلان کیا ہے، جس کا مقصد فلسطین کے مسئلے پر عوام میں آگاہی پیدا کرنا اور امت مسلمہ میں یکجہتی قائم کرنا ہے۔ دونوں رہنماؤں نے 27 اپریل کو لاہور کے مینار پاکستان پر فلسطین کی حمایت میں ایک بڑے جلسے کا اعلان کیا۔
مولانا فضل الرحمان نے لاہور میں ایک مشترکہ نیوز کانفرنس کے دوران کہا کہ فلسطین کی موجودہ صورتحال پوری مسلم امت کے لیے باعث تشویش ہے، اور اس مسئلے پر اسلامی ممالک کا ایک واضح اور متفقہ موقف اپنانا انتہائی ضروری ہے۔ انہوں نے کہا کہ "اتحاد امت" کے پلیٹ فارم سے ملک بھر میں فلسطین کے حق میں بیداری کی مہم چلائی جائے گی، اور 27 اپریل کو مینار پاکستان پر ہونے والا جلسہ اس بات کا پیغام دے گا کہ فلسطین کے معاملے پر ہم سب ایک ہیں۔
مولانا فضل الرحمان نے کہا کہ اسرائیل کے حق میں بعض لابیاں موجود ہیں، لیکن ان کا اثر بہت کم ہے اور ان کی کوئی حیثیت نہیں ہے۔ انہوں نے مزید کہا کہ فلسطین کے مسئلے پر عالمی سطح پر اسلامی دنیا کا موقف واضح ہونا چاہیے، اور اس کے لیے ضروری ہے کہ امت مسلمہ اپنے حکمرانوں کے غفلت والے رویے پر سوال اٹھائے۔
حافظ نعیم الرحمان نے اس موقع پر کہا کہ جماعت اسلامی نے 26 ویں آئینی ترمیم کو مسترد کیا ہے، اور وہ اپنے پلیٹ فارم سے مختلف مسائل پر جدوجہد کریں گے۔ انہوں نے کہا کہ جماعت اسلامی عوامی مسائل کے حل کے لیے مسلسل سرگرم ہے اور آئندہ بھی اپنے مؤقف پر قائم رہے گی۔
