اسلام آباد : وفاقی کابینہ نے 26 ویں آئینی ترمیم کے مسودے کی منظوری دے دی ہے۔
وزیراعظم شہباز شریف کی قیادت میں وفاقی کابینہ کا اجلاس پارلیمنٹ ہاؤس میں منعقد ہوا، جس میں 26 ویں آئینی ترمیم کے مسودے اور ملکی سیاسی حالات پر بحث کی گئی۔ اجلاس کے دوران کابینہ نے اس آئینی ترمیم کے مسودے کی منظوری دی۔
وزیراعظم نے اجلاس میں کہا کہ کابینہ نے ملکی ترقی اور خوشحالی کے لیے اہم فیصلے کیے ہیں اور قوم کو اس آئینی ترمیم کی منظوری پر مبارکباد دی۔ انہوں نے یہ بھی کہا کہ معیشت کے استحکام کے بعد اب آئینی استحکام کی طرف بھی قدم اٹھایا گیا ہے، اور حکومت ملک کی ترقی کے لیے محنت جاری رکھے گی۔
آئینی ترمیمی مسودہ اب قومی اسمبلی اور سینیٹ میں پیش کیا جائے گا۔ اسی دوران پی ٹی آئی کا ایک وفد، جس کی قیادت بیرسٹر گوہر علی خان کر رہے ہیں، مولانا فضل الرحمان سے ملاقات کے لیے پہنچا ہے تاکہ ترمیم کے بارے میں مزید بات چیت کی جا سکے۔
جے یو آئی کے رہنما کامران مرتضیٰ نے بتایا کہ اگر ان کی جماعت نے ووٹ نہیں دیا تو حکومت اپنی مرضی کا مسودہ منظور کروا سکتی ہے، اور اس صورت میں آئینی ترامیم کے کچھ دیگر آرٹیکلز میں بھی تبدیلیاں ہو سکتی ہیں۔
