کراچی: سندھ میں بورڈ امتحانات مذاق بن گئے ، پرچے وقت سے پہلے آوٹ ہونے کا سلسلہ روکا نہ جا سکا ۔ کراچی ، سکھر اور کوٹ ڈیجی میں بیالوجی اور فزکس کے پرچے امتحان شروع ہونے سے پہلے ہی آوٹ ہو گئے ۔
تفصیلات کے مطابق کراچی بوڈ کا دسویں جماعت کا آج ہونے والا بیالوجی کا پرچہ وقت سے پہلے آوٹ ہو کر سوشل میڈیا پر پہنچ گیا ۔ حل شدہ پرچہ بھی واٹس ایپ گروپ پر دستیاب رہا ۔ اس صورتحال میں چیئرمین میٹرک بورڈ شرف علی شاہ نے ذمہ داری امتحانی مراکز پر ڈال کر اپنی جان چھڑا لی ۔
ادھر ، سکھر بورڈ کے زیر انتظام پنو عاقل میں چوتھے روز بھی دسویں جماعت کا فزکس کا پرچہ وقت سے پہلے آؤٹ ہو گیا ، امتحانی مراکز میں طلبہ موبائل فونز کے ذریعے نقل کر کے پرچہ حل کرنے میں مصروف رہے ۔
کوٹ ڈیجی میں بھی دسویں جماعت کا فزکس کا پرچہ وقت سے پہلے لیک ہو گیا ، طلبہ کی جانب سے امتحانی سینٹرز میں سرعام موبائل فون کا استعمال جاری رہا ، حل شدہ جواب واٹس ایپ گروپس میں بھی گردش کرتے رہے ۔
