لاہور : وزیر اطلاعات پنجاب عظمیٰ بخاری نے کہا ہے کہ تمام صوبوں کے عوام وزیراعلیٰ مریم نواز کی کارکردگی کی گواہی دے رہے ہیں، اور سروے رپورٹ کے مطابق 70 فیصد لوگ ان کی کارکردگی سے متاثر ہیں۔
لاہور میں پریس کانفرنس کرتے ہوئے انہوں نے کہا کہ وزیراعلیٰ مریم نواز نے کسانوں کو سہولتیں فراہم کی ہیں اور اس وقت تک 54 ارب روپے کے قرضے چھوٹے کسانوں کو دیے جا چکے ہیں۔ عظمیٰ بخاری نے بتایا کہ وزیراعلیٰ کے کسان کارڈ پر 54 ارب روپے کی خریداری ہو چکی ہے، اور پنجاب حکومت اب تک 10 ہزار گرین ٹریکٹرز فراہم کر چکی ہے۔ انہوں نے یہ بھی کہا کہ وزیراعلیٰ مریم نواز نے 30 ہزار بچوں کو اسکالرشپس فراہم کی ہیں۔
صوبائی وزیر نے مزید کہا کہ وزیراعلیٰ مریم نواز مریضوں کو گھروں تک بیماریوں کی ادویات پہنچا رہی ہیں، اور ڈائیلسز پروگرام کے تحت 10 لاکھ تک کا کارڈ لوگوں کو فراہم کیا جا رہا ہے۔ اس کے علاوہ، ایئرایمبولینس سروس بھی 10 ماہ میں شروع کی جائے گی۔ عظمیٰ بخاری نے بتایا کہ وزیراعلیٰ مریم نواز نے لائیوسٹاک کارڈ کا منصوبہ شروع کیا ہے، جس سے مویشیوں کو باہر بھیج کر زرمبادلہ کمایا جائے گا۔ انہوں نے کہا کہ وزیراعلیٰ نے "اپنی چھت اپنا گھر" پروگرام کے تحت ہزاروں گھر بنائے ہیں۔
وزیر اطلاعات نے سابق وزیراعلیٰ عثمان بزدار پر تنقید کرتے ہوئے کہا کہ اگر وہ اتنے قابل ہوتے تو خود اپنا تعارف کراتے۔ انہوں نے کہا کہ پی ٹی آئی حکومت نے روڈا منصوبے کو تباہ کر دیا اور اس پر تمام صحافیوں کو ٹرک کی بتی کے پیچھے لگایا گیا۔ عظمیٰ بخاری نے کہا کہ پی ٹی آئی دور میں کینسر کے مریضوں کی ادویات بند کر دی گئیں اور جھوٹ بولا گیا کہ ایئرایمبولینس لانی ہے اور الیکٹرک بسیں چلائیں گے۔
انہوں نے اپوزیشن لیڈر کو مشورہ دیتے ہوئے کہا کہ وہ اپنے لوگوں کا خود سامنا کریں اور جو جھوٹ پر مبنی وائٹ پیپر چھاپا گیا، اسے بلاک کر دیں۔
