اسلام آباد : حکومت نے یوم پاکستان 23 مارچ کو محدود پیمانے پر روایتی جوش و جذبے کے ساتھ منانے کا فیصلہ کیا ہے۔
ذرائع کے مطابق، یوم پاکستان پریڈ اس سال رمضان المبارک کے پیش نظر محدود پیمانے پر منعقد کی جائے گی، تاہم اس میں تینوں مسلح افواج کے دستے بھرپور شرکت کریں گے۔ پریڈ ایوان صدر کے احاطے میں ہوگی اور صدر مملکت آصف علی زرداری اس تقریب کے مہمان خصوصی ہوں گے۔ مسلح افواج کے دستے اس موقع پر مہمان خصوصی کو سلامی پیش کریں گے۔
پریڈ میں پاک فضائیہ کے لڑاکا طیارے ایوان صدر کے سامنے فلائی پاسٹ کریں گے، اور پاکستان آرمی کا مایہ ناز پائپ بینڈ بھی اپنی پرفارمنس پیش کرے گا۔ اس تقریب میں غیر ملکی سفیروں اور اہم شخصیات کو بھی مدعو کیا گیا ہے۔
