لاہور : محکمہ موسمیات نے پاکستان کے مختلف حصوں میں تیز ہواؤں اور بارش کی پیشگوئی کی ہے۔ محکمہ موسمیات کے مطابق ملک کے بیشتر حصوں میں موسم خشک رہنے کا امکان ہے، تاہم بالائی پہاڑی علاقوں میں رات اور صبح کے اوقات میں سردی محسوس ہو سکتی ہے۔
اسلام آباد اور اس کے گرد و نواح میں جزوی طور پر ابر آلود موسم رہنے کا امکان ہے، جب کہ مری، گلیات اور ان کے قرب و جوار میں گرج چمک کے ساتھ بارش متوقع ہے۔ گجرات، گوجرانوالہ، راولپنڈی، چکوال، جہلم، تلہ گنگ اور میانوالی میں بھی چند مقامات پر گرج چمک کے ساتھ بارش ہو سکتی ہے۔
دیر، سوات، شانگلہ، ہری پور، مانسہرہ، ایبٹ آباد، چارسدہ، نوشہرہ، پشاور، کوہاٹ، کرک، باجوڑ، کرم اور مالاکنڈ میں بارش ہونے کی توقع ہے۔ بلوچستان کے بیشتر اضلاع میں موسم خشک رہنے کی پیشگوئی کی گئی ہے، تاہم شمالی اضلاع میں جزوی طور پر ابر آلود موسم رہنے کا امکان ہے۔ سندھ کے بیشتر علاقوں میں موسم خشک اور زیریں حصوں میں گرم رہنے کی توقع ہے۔
وزیرستان میں چند مقامات پر تیز ہواؤں اور گرج چمک کے ساتھ بارش ہو سکتی ہے، اور آزادکشمیر میں بھی چند مقامات پر گرج چمک اور بارش کی توقع ہے۔