اسلام آباد: مسلم لیگ ن پنجاب کے صدر اور رکن قومی اسمبلی رانا ثناء اللہ نے کہا ہے کہ آئندہ انتخابات میں ٹکٹ کی یقین دہانی پر حکومت کے 10 سے زائد ارکان قومی اسمبلی مسلم لیگ ن میں شامل ہونے کے لیے تیار ہیں ۔
انہوں نے نجی ٹی وی کے پروگرام میں گفتگو کرتے ہوئے کہا کہ وسطی اور جنوبی پنجاب دونوں طرف سے ارکان اسمبلی مسلم لیگ ن میں آنا چاہتے ہیں لیکن اس میں مسلم لیگ ن کے کچھ مسائل ہیں۔
انہوں نے کہا کہ جنوبی پنجاب میں تو ہمارے پاس کچھ سپیس ہے اور وہاں ہم تحریک انصاف سے آنے والے ایم این ایز کو ایڈجسٹ کرسکتے ہیں لیکن وسطی پنجاب میں ہمارے پاس مضبوط امیدوار ہیں۔
رانا ثنا کا کہنا تھا کہ جو ن لیگ کے ارکان 2018ء میں منتخب نہ ہوسکے اس کی وجہ یہ نہیں تھی کہ وہ کمزور امیدوار تھے بلکہ ان کو ہروایا گیا ہے اور وہ چار سال سے پارٹی کے ساتھ کھڑے ہیں لہٰذا ہم یہ نہیں کرسکتے کہ نئے آنے والوں کو ٹکٹ دے دیں اور قربانیاں دینے والوں کو بھول جائیں۔
انہوں نے مزید بتایا کہ ہم فارمولا بنا رہے ہیں اور اس پر غور و خوص جاری ہے جلد ہی اس حوالے سے فیصلہ کرلیا جائے گا۔