کراچی: مشترکہ تحقیقاتی ٹیم نے پیپلزپارٹی کے رہنما خورشید شاہ کے آمدن سے زائد اثاثوں کی تحقیقات شروع کر دیں۔ ذرائع کے مطابق مشترکہ تحقیقاتی ٹیم ڈی جی نیب ملتان کی سربراہی میں کام کر رہی ہے جس میں قانون نافذ کرنے والے ادارے کے افسران سمیت مختلف ماہرین شامل ہیں۔
ذرائع کے مطابق جے آئی ٹی کو نیب کمبائن انویسٹی گیشن ٹیم کی جانب سے تحقیقاتی رپورٹ اور شواہد کے ساتھ ان کے مبینہ فرنٹ مینوں کی جائیداد اور بینک اکاؤنٹ کی تفصیلات بھی فراہم کی گئی ہیں۔
ذرائع نے بتایا کہ یہ تفصیلات نیب ٹیم نے جے آئی ٹی ارکان کو فراہم کیں جب کہ جے آئی ٹی کے ارکان نے سیکیورٹی ایکسچینج کمیشن سے بھی اہم شواہد حاصل کیے۔
ذرائع کے مطابق جے آئی ٹی دستاویزات کی چھان بین کے بعد خورشید شاہ اور ان کے اہل خانہ سے پوچھ گچھ کرے گی۔
ذرائع کا کہنا ہےکہ جے آئی ٹی کو خورشید شاہ کے 30 ارب سے زائد اثاثوں کی تفصیلات فراہم کی گئی ہیں۔
