کیلیفورنیا:ایپل نے 19 فروری کو اپنی آئی فون 16 سیریز کا سب سے سستا ماڈل، آئی فون 16 ای، متعارف کرایا ہے۔ یہ نیا فون ایپل کی آئی فون ایس ای سیریز کی جگہ لے گا اور اس میں ہوم بٹن کو ختم کر دیا گیا ہے، جس کے ساتھ ایپل کی تمام ڈیوائسز ہوم بٹن فری ہو گئی ہیں۔
نیا آئی فون 16 ای ڈیزائن کے اعتبار سے آئی فون 14 سے مشابہ ہے، مگر فیچرز کے لحاظ سے یہ آئی فون 16 کے قریب تر ہے۔ فون میں اے 18 چپ، 6.1 انچ کا OLED ڈسپلے اور 48 میگا پکسل کا کیمرا دیا گیا ہے، جس میں 2x زوم کی سہولت بھی شامل ہے، حالانکہ یہ کیمرا آئی فون 16 کے کیمرے سے کچھ پیچھے ہے۔
ایپل نے یہ بھی دعویٰ کیا ہے کہ یہ فون بیٹری لائف کے لحاظ سے اب تک کا بہترین آئی فون ہوگا، جو سنگل چارج پر آئی فون 11 سے 6 گھنٹے زیادہ چلتا ہے۔ مزید یہ کہ، اس کی بیٹری 2016 کے آئی فون ایس ای سے 12 گھنٹے زیادہ دیر تک کام کرتی ہے۔
آئی فون 16 ای میں فیس آئی ڈی سے ان لاک کرنے کی سہولت، یو ایس بی سی چارجنگ سپورٹ، اور آئی او ایس 18 سسٹم دیا گیا ہے۔ اس فون میں ایپل کا تیار کردہ موڈیم بھی موجود ہے، جو سیٹلائیٹ کنیکٹیویٹی کی سہولت فراہم کرتا ہے، جیسے ایمرجنسی ایس او ایس، روڈ سائیڈ اسسٹنٹ، اور فائنڈ مائی فون۔
یہ فون سفید اور سیاہ رنگ میں 28 فروری سے مختلف ممالک میں دستیاب ہوگا اور اس کی قیمت 599 ڈالر سے شروع ہوگی۔
