لاہور :پنجاب میں آن لائن ایپ سے چلنے والی گاڑیوں کو صوبائی ٹرانسپورٹ سے اجازت نامہ لینا لازمی قرار دے دیا گیا ہے۔ پنجاب اسمبلی میں پیش کی گئی تجاویز کے مطابق، آن لائن کیب سروسز کو ریگولیٹ کرنے کے لیے ایک نیا بل منظور کیا گیا ہے جس کے تحت گاڑیوں اور ڈرائیورز کو لائسنس دینے کا نظام متعارف کرایا جائے گا۔
اسمبلی میں پیش کیے گئے بل کو "صوبائی موٹر گاڑیاں ترمیمی ایکٹ 2024" کا نام دیا گیا ہے۔ اس بل کے تحت گاڑی مالک یا ڈرائیور کو اپنی گاڑی کی رجسٹریشن، فٹنس سرٹیفکیٹ اور لائسنس پیش کرنا ضروری ہوگا۔
اس بل کے مطابق، آن لائن چلنے والی گاڑیوں کا اجازت نامہ ایک سال کے لیے جاری کیا جائے گا اور ہر سال اس کی تجدید کرانی ہوگی۔ ایپلی کیشنز کو ڈرائیورز اور گاڑیوں کی مکمل معلومات حکومت کو فراہم کرنا ہوں گی۔
بل میں مزید کہا گیا ہے کہ مسافروں کی حفاظت کے لیے ایپ کمپنیوں کو شکایات حل کرنے کے نظام کا قیام ضروری ہوگا۔ اگر کوئی ڈرائیور قواعد کی خلاف ورزی کرتا ہے تو اس پر 2 ہزار روپے تک کا جرمانہ عائد کیا جا سکتا ہے۔ یہ بل آن لائن کیب سروسز کی بہتر نگرانی اور صارفین کی حفاظت کے لیے اہم قدم ثابت ہو گا۔
