لاہور : لاہور میں پریس کانفرنس کرتے ہوئے وزیر اطلاعات پنجاب عظمیٰ بخاری نے کہا کہ بہت سے لوگ سیاستدانوں کے روپ میں سازشیں کر رہے ہیں۔ انہوں نے مزید کہا کہ وزیراعلیٰ پنجاب مریم نواز نے 26 فروری کو عہدے کا حلف اٹھایا اور مسلم لیگ ن کی حکومت نے پہلے سال میں کامیابی کے جھنڈے گاڑھے ہیں۔
انہوں نے اس بات پر زور دیا کہ کہا جاتا ہے کہ پہلے سال میں حکومتیں کام نہیں کر پاتیں، لیکن مسلم لیگ ن نے اپنے پہلے سال میں بہترین کارکردگی دکھائی ہے۔ عظمیٰ بخاری نے کہا کہ وزیراعلیٰ مریم نواز کا "ستھرا پنجاب" پروگرام صوبے کے عوام کے دلوں میں جگہ بنا چکا ہے۔ انہوں نے کہا کہ ناقدین شاید حقائق سے بہت دور ہیں، اور ان کو دعوت دی کہ آئیں اور ہماری حکومت کی کارکردگی کا مقابلہ کریں۔
انہوں نے کہا کہ پاکستان کو دوسروں پر حملے یا گالی گلوچ نہیں چاہیے، اور مخالفین کی جانب سے وزیراعلیٰ مریم نواز پر ذاتی حملے کرنے والے لوگ وہ ہیں جن کی تربیت ٹھیک نہیں ہوتی۔ عظمیٰ بخاری نے مزید کہا کہ ہم نے نارووال میں کوئی جلسہ تشہیر نہیں کیا تھا، وہاں صرف سڑکوں کا افتتاح کیا گیا جو بعد میں جلسے کی شکل اختیار کر گیا۔
انہوں نے اس بات کا تذکرہ بھی کیا کہ مسلم لیگ ن کے بارے میں کہا جاتا تھا کہ یہ ختم ہو چکی ہے اور عوام میں نہیں نکل سکتی، لیکن حقیقت یہ ہے کہ عوام کی حمایت کے ساتھ ہم نے کامیاب پروگرامز متعارف کروائے ہیں۔
صوبائی وزیر محکمہ بلدیات ذیشان رفیق نے کہا کہ وزیراعلیٰ مریم نواز نے تمام شہروں اور دیہاتوں کی صفائی کے کام کی نگرانی کی، اور پنجاب کی 154 تحصیلوں میں سے 140 تحصیلوں کو آؤٹ سورس کر دیا ہے۔ انہوں نے کہا کہ پنجاب کی 14 تحصیلوں میں ویسٹ مینجمنٹ کمپنی خود کام کر رہی ہے اور اس پروگرام سے نہ صرف صفائی میں بہتری آئی ہے بلکہ صوبے کے عوام کو فائدہ بھی پہنچا ہے۔
ذیشان رفیق نے بتایا کہ "ستھرا پنجاب" پروگرام کے تحت ایک لاکھ 25 ہزار سے زائد نوکریاں دینے کا ہدف تھا، اور اب تک 91 ہزار سے زائد لوگوں کو نوکریاں دی جا چکی ہیں۔
