لاہور : چیمپئنز ٹرافی کے ابتدائی میچ میں فیلڈنگ کے دوران انجری کا شکار ہونے والے قومی ٹیم کے اوپنر فخر زمان ٹورنامنٹ سے باہر ہوگئے ہیں۔ پاکستان کرکٹ بورڈ (پی سی بی) کے ذرائع کے مطابق، فخر زمان بھارت کے خلاف 23 فروری کو ہونے والے میچ کے لیے دبئی روانہ ہونے والی ٹیم کے ہمراہ نہیں جائیں گے۔
ذرائع کا کہنا ہے کہ فخر زمان کی انجری کی نوعیت سنگین ہے، جس کی وجہ سے وہ مزید ٹورنامنٹ میں شرکت نہیں کر پائیں گے۔ پی سی بی نے اس بات کی تصدیق کی ہے کہ متبادل کھلاڑی کے لیے آئی سی سی ٹیکنیکل کمیٹی سے رابطہ کیا گیا ہے اور فخر زمان کی جگہ ایک نئے اوپنر کو شامل کرنے کے لیے مختلف ناموں پر غور کیا جا رہا ہے۔ امام الحق کو اس پوزیشن کے لیے مضبوط امیدوار سمجھا جا رہا ہے۔
یاد رہے کہ فخر زمان نیوزی لینڈ کے خلاف میچ کے دوران پہلے اوور میں فیلڈنگ کرتے ہوئے انجری کا شکار ہوئے تھے۔ انہیں دو مرتبہ میدان سے باہر جانا پڑا تھا، مگر علاج کے بعد وہ دوبارہ میدان میں واپس آ کر اننگز کے آخر تک فیلڈنگ کرتے رہے، تاہم بیٹنگ کے دوران وہ تکلیف میں نظر آئے۔