لاہور : پنجاب کی تاریخ میں پہلی مرتبہ تمام بڑے شہروں میں سیوریج اور نکاسی آب کا نیا سسٹم لانے کے لیے پنجاب ڈویلپمنٹ پروگرام کا آغاز کرنے کا اصولی فیصلہ کیا گیا ہے۔ وزیراعلیٰ پنجاب مریم نواز کی زیر صدارت خصوصی اجلاس میں صوبے میں جاری مختلف منصوبوں کا جائزہ لیا گیا اور ڈبلیو اے ٹی ایس این کے تحت جاری پراجیکٹس پر بھی تفصیل سے بات چیت کی گئی۔
وزیراعلیٰ مریم نواز نے سیوریج اور ڈرینج سسٹم کے میگا پلان کی منظوری دی اور ایک لاکھ سے زائد آبادی والے 189 شہروں کے لیے پلان طلب کیا۔ اس منصوبے کے تحت سیوریج، واٹر ڈرینج، بارش کے پانی کا نکاس، گلیوں کی فرش بندی اور دیگر ترقیاتی کاموں کی تیاری کی جائے گی۔
پنجاب میں پہلی بار شہروں میں سیوریج بائی پاس اور ڈسپوزل سٹیشن بنانے کا فیصلہ کیا گیا ہے۔ بارش کے پانی کے فوری نکاس کے لیے سٹوریج ٹینک بھی بنائے جائیں گے، جن میں ذخیرہ شدہ پانی کو آبپاشی اور دیگر مقاصد کے لیے استعمال کیا جائے گا۔
اجلاس میں یہ بھی طے پایا کہ شہروں میں سیوریج اور واٹر سپلائی کی پائپ لائنز کو مناسب فاصلے پر بچھایا جائے گا تاکہ صاف پانی سیوریج لائن میں مکس نہ ہو۔ علاوہ ازیں، ہر صوبائی حلقے میں 30 کلومیٹر سڑکوں کی تعمیر و بحالی بھی کی جائے گی۔
اس دوران پنجاب میں ماڈل ویلیجز بنانے کی تجویز کا بھی جائزہ لیا گیا، جس کی وزیراعلیٰ نے منظوری دے دی۔ مریم نواز نے پنجاب ڈویلپمنٹ پروگرام پر فوری عملدرآمد کے لیے ضروری اقدامات کا حکم بھی دیا۔
وزیراعلیٰ مریم نواز کا کہنا تھا کہ "ستھرا پنجاب پروگرام" سے صوبے کے عوام کو بہت فائدہ ہوگا۔ انہوں نے مزید کہا کہ سیوریج کا مؤثر نظام نہ ہونے کی وجہ سے ہر شہر میں مسائل کا سامنا ہے، لیکن ایک دیرپا اور محفوظ سسٹم بنانے سے سڑکیں ٹوٹ پھوٹ سے محفوظ رہیں گی۔