کراچی: سندھ حکومت نے پرانی گاڑیوں کی بایومیٹرک کی مدت میں دو ماہ کی توسیع کر دی ہے۔ یہ فیصلہ صوبائی وزیر ایکسائز، ٹیکسیشن اینڈ نارکوٹکس کنٹرول سندھ مکیش کمار چاولہ کی زیر صدارت ہونے والی ایک اہم ملاقات کے دوران کیا گیا۔ ملاقات میں کار ڈیلرز ایسوسی ایشن کے چیئرمین محمد کامران خان کی سربراہی میں وفد نے شرکت کی۔
مکیش کمار چاولہ نے ملاقات کے دوران کہا کہ پرانی گاڑیوں کی بایومیٹرک کی مدت میں توسیع کے ساتھ ساتھ گاڑیوں کی نمبر پلیٹس کی تبدیلی کے عمل کو بھی مزید آسان بنانے کے لیے آن لائن سسٹم متعارف کرایا جائے گا۔ یہ سسٹم گاڑیوں کے مالکان کو فوری طور پر نمبر پلیٹس فراہم کرے گا، جس سے عوام کو سہولت ملے گی۔
انہوں نے مزید کہا کہ عوام کی سہولت کے لیے صوبے بھر میں سہولت مراکز قائم کیے جائیں گے تاکہ گاڑیوں کے ٹیکسز، رجسٹریشن اور بایومیٹرک کے عمل کو مزید سادہ اور تیز تر بنایا جا سکے۔
وزیر ایکسائز نے کہا کہ ان اقدامات کا مقصد عوام کو بہتر سروسز فراہم کرنا ہے اور ان کے لیے حکومتی طریقہ کار کو سہل بنانا ہے۔
