نصیر آباد: مسلم لیگ فنکشنل کے سربراہ اور حر جماعت کے روحانی پیشوا، پیر پگارا نے کہا ہے کہ ہم ہمیشہ اپنے ووٹ الف کو دیتے ہیں، لیکن حکومت میں ب آ جاتا ہے۔
پیر پگارا نے ایک پریس کانفرنس میں حکومت کی موجودہ کارکردگی پر شدید تنقید کرتے ہوئے کہا کہ یہ حکومت جھوٹ پر قائم ہے اور اس کی پالیسیاں کامیاب نہیں ہو رہی ہیں۔ انہوں نے کہا کہ اگر حکومت عوام کو روزگار فراہم نہیں کر سکتی، تو کم از کم ان کی عزت نفس کی حفاظت کرے۔
انہوں نے مزید کہا کہ حکومت میں بیٹھے افراد ایک دوسرے کے ساتھ جھوٹ بول رہے ہیں اور یہ کہ عوام کے ووٹ سے نہ حکومت بنتی ہے اور نہ ٹوٹتی ہے۔ پیر پگارا نے دعویٰ کیا کہ ملک کے مسائل حل کرنے کے لیے صرف ایماندار قیادت کی ضرورت ہے، اور اگر عزت دار لوگ سیاست سے باہر ہو گئے تو ملک کے معاملات ٹھیکیداروں کے ہاتھوں میں آ جائیں گے۔
پیر پگارا نے سندھ اور بلوچستان میں پانی کے مسائل پر بھی تشویش کا اظہار کیا، اور کہا کہ جہاں پانی کا مسئلہ ہے، وہاں لوگ پینے کے پانی کے لیے لڑ رہے ہیں۔ انہوں نے کہا کہ سیلاب کی صورتحال بھی تشویش کا باعث ہے اور اگر سندھ کو پانی ملے گا تو وہ بلوچستان کی طرف جائے گا۔
