کیلیفورنیا:واٹس ایپ نے چیٹ میسجز اور چینل اپ ڈیٹس کے لیے ٹیکسٹ ترجمہ فیچر پر گزشتہ سال سے کام شروع کر دیا تھا، اور اب یہ فیچر اینڈرائیڈ ڈیوائسز کے بیٹا ورژن میں دستیاب ہے۔
WABetaInfo کی رپورٹ کے مطابق، اس فیچر کو کچھ بیٹا صارفین کے لیے متعارف کرایا گیا ہے اور آنے والے ہفتوں میں اسے مزید بیٹا صارفین تک پہنچایا جائے گا۔ یہ فیچر اسپینش، عربی، پرتگیز، ہندی اور روسی زبانوں میں ترجمے کی سہولت فراہم کرے گا۔
اس فیچر کی خاص بات یہ ہے کہ اب صارفین کو انٹرنیٹ کنکشن کی ضرورت نہیں ہوگی۔ انٹرنیٹ کے بغیر بھی ٹیکسٹ کا ترجمہ کرنے کے لیے صارفین کو صرف مطلوبہ زبان کے لینگوئج پیک کو ڈاؤن لوڈ کرنا ہوگا۔ ایک بار پیک ڈاؤن لوڈ کرنے کے بعد، صارفین خودکار طور پر پیغامات کا ترجمہ کرسکیں گے۔
صارفین کو یہ فیچر سیٹنگز میں جا کر چیٹ سیکشن میں فعال کرنا ہوگا۔ وہاں، وہ زبان منتخب کر سکیں گے جس کے میسجز کا خودکار ترجمہ کرانا چاہتے ہیں۔ اس فیچر کا استعمال ون آن ون اور گروپ چیٹس دونوں میں کیا جا سکتا ہے۔
اگر صارفین نہیں چاہتے کہ میسجز کا خودکار ترجمہ ہو، تو وہ میسج آپشنز میں جا کر "ٹرانسلیٹ" آپشن کو غیر فعال کر سکتے ہیں۔
رپورٹ میں کہا گیا ہے کہ صارفین کو فی الحال ترجمے پر مکمل بھروسا نہیں کرنا چاہیے کیونکہ واٹس ایپ ڈیوائس میں لائٹ ویٹ لینگوئج پیکس پر انحصار کرے گا۔ تاہم، واٹس ایپ صارفین کے فیڈ بیک کی بنیاد پر اس فیچر کو مزید بہتر بنائے گا۔