لاہور: پاکستان کرکٹ بورڈ (پی سی بی) نے قومی کرکٹ ٹیم کے لیے ایک بار پھر مستقل ہیڈ کوچ کی تلاش شروع کر دی ہے، جس کے لیے باقاعدہ اشتہار بھی جاری کر دیا گیا ہے۔
سابق ٹیسٹ کرکٹر عاقب جاوید کو عبوری طور پر چیمپئنز ٹرافی تک ہیڈ کوچ مقرر کیا گیا تھا، بعد ازاں نیوزی لینڈ کے دورے پر بھی انہیں ذمہ داریاں دی گئیں۔ تاہم ذرائع کے مطابق عاقب جاوید اب ہیڈ کوچ کے عہدے میں دلچسپی نہیں رکھتے بلکہ وہ ڈائریکٹر ہائی پرفارمنس کی پوزیشن میں دلچسپی لے رہے ہیں۔
اسی وجہ سے پی سی بی نے اپنی ویب سائٹ پر ہیڈ کوچ کی آسامی کے لیے درخواستیں طلب کر لی ہیں۔ ساتھ ہی ندیم خان کے استعفے کے بعد ڈائریکٹر ہائی پرفارمنس کے لیے بھی اشتہار جاری کر دیا گیا ہے۔ ذرائع کا کہنا ہے کہ پی سی بی اس بار ایک بار پھر غیر ملکی کوچ کی جانب جا سکتا ہے، اور ممکنہ طور پر کوئی تجربہ کار انٹرنیشنل کوچ ٹیم کی ذمہ داری سنبھالے گا۔
