نئی دہلی: بھارت میں اپوزیشن جماعت کانگریس کے رہنما راہول گاندھی بھی عالمی وبا کورونا کا شکار ہو گئے ہیں۔
تفصیلات کے مطابق بھارت میں کورونا کی دوسری لہر کی ہلاکت خیزی جاری ہے اور روز بروز کورونا کیسز میں اضافہ ہو رہا ہے۔ بھارت کی متعدد نامور شخصیات کورونا کاشکار بن گئی ہیں جبکہ اب اپوزیشن جماعت کانگریس کے رہنما راہول گاندھی میں بھی کورونا کی تشخیص ہوئی ہے۔
After experiencing mild symptoms, I’ve just tested positive for COVID.
— Rahul Gandhi (@RahulGandhi) April 20, 2021
All those who’ve been in contact with me recently, please follow all safety protocols and stay safe.
اپنی ٹوئٹ میں راہول گاندھی کا کہنا تھاکہ کچھ علامات ظاہر ہونے پر کورونا ٹیسٹ کرایا جو مثبت آیا ہے۔ گزشتہ دنوں مجھ سے رابطے میں رہنے والے افراد تمام احتیاطی تدابیر اختیار کریں۔
گزشتہ روز بھارت کے سابق وزیراعظم ڈاکٹر منموہن سنگھ کا کورونا ٹیسٹ مثبت آ گیا تھا جس کے بعد انہیں اسپتال میں داخل کر دیا گیا تھا۔
کانگریس کے 88 سالہ بزرگ رہنما ڈاکٹر منموہن سنگھ نے عالمی وبا قرار دیے جانے والے کورونا وائرس سے بچاؤ کی ویکسین بھی لگوائی ہوئی تھی۔ سابق بھارتی وزیراعظم منموہن سنگھ نے کورونا ویکسین کی پہلی خوراک 4 مارچ کو لگوائی تھی جب کہ دوسری خوراک 3 اپریل کو لگوائی تھی۔
واضح رہے کہ دہلی میں وبا کی وجہ سے مریضوں کی شرح بڑھ کر تقریبا 30 فیصد ہو گئی ہے اور دہلی کے اسپتالوں میں بیڈ اور آئی سی یو کی بہت بڑی قلت پیدا ہو گئی ہے۔ دہلی حکومت کے سب سے بڑے لوک نائک اسپتال میں نہ تو عام بستر اور نہ ہی آئی سی یو بستر خالی ہے بلکہ کورونا کے مریض تمام اسپتالوں میں کھڑے ہیں۔
اس صورتحال میں دہلی کے وزیر اعلیٰ اروند کیجریوال نے پیر کو لیفٹیننٹ گورنر انیل بیجل سے ملاقات میں مکمل لاک ڈاؤن نافذ کرنے کا فیصلہ کیا تھا۔
لاک ڈاؤن کے دوران نئی دہلی میں تمام مارکیٹیں بند رہیں گی اور ریستوران میں بیٹھنے کی اجازت نہیں ہوگی جب کہ ریلوے اسٹیشن ، بس اسٹیشن ، ہوائی اڈے کے لیے مسافروں کو ٹکٹ دکھانا لازمی ہو گی۔
