راولپنڈی: چیف آف آرمی سٹاف جنرل سید عاصم منیر نے کہا ہے کہ جو بھی فرد یا ادارہ پاکستان کی سکیورٹی میں رکاوٹ ڈالے گا یا فوج کو اس کے فرائض انجام دینے سے روکے گا، اسے سخت نتائج کا سامنا کرنا پڑے گا۔
اپیکس کمیٹی کے اجلاس میں خطاب کرتے ہوئے جنرل عاصم منیر نے کہا کہ دہشت گردی کے خلاف جنگ میں ہر پاکستانی کا کردار اہم ہے، چاہے وہ وردی میں ہو یا بغیر وردی کے۔ ان کا کہنا تھا کہ ملک کی سکیورٹی کے لیے ہم سب کو متحد ہو کر دہشت گردی کے ناسور کا مقابلہ کرنا ہے۔
آرمی چیف نے مزید کہا کہ پاکستان کے آئین کی بالادستی ہماری اولین ترجیح ہے اور اس کے تحت اندرونی اور بیرونی سکیورٹی کی ذمہ داری پوری کرنا ہماری مشترکہ ذمہ داری ہے۔ انہوں نے اس بات پر زور دیا کہ پاک فوج اور دیگر قانون نافذ کرنے والے ادارے گورننس کے مسائل حل کرنے کے لیے شہیدوں کی قربانیاں دے رہے ہیں اور ہر روز اس جنگ کو جاری رکھے ہوئے ہیں۔
جنرل عاصم منیر نے کہا کہ دہشت گردی کے خاتمے کے لیے تمام اداروں کو مل کر کام کرنا ہوگا، اور ہم آئین کی حفاظت کے لیے کسی بھی قسم کی قربانی دینے کے لیے تیار ہیں۔
