اسلام آباد: سال 2023 میں ہونے والے عام انتخابات کی تیاریوں کے سلسلے میں کام کا آغاز کر دیا گیا ہے اور ووٹر لسٹوں کے تصدیق کا عمل جاری ہے۔
ایڈیشنل ڈائریکٹر جنرل الیکٹرورول برائے اسلام آباد الیکشن کمیشن جاوید اقبال نے میڈیا سے گفتگو کرتے ہوئےکہا کہ الیکشن کمیشن نے ووٹرز کا تصدیقی عمل شروع کر رکھا ہے۔
انہوں نے عوام سے اپیل کی کہ ووٹوں کی تصدیق کے مرحلے میں عملے کے ساتھ تعاون کیا جائے، جن افراد کا اندراج ہو چکا ہے وہ نئی ووٹر لسٹوں میں آ جائے گا۔
ایک سوال کے جواب میں ان کا کہنا تھا کہ ووٹر لسٹوں کا ڈسپلے کا مرحلہ دوسرا ہوگا، جن لوگوں کے نام رہ جائیں گے وہ اس میں بھی درج کرواسکتے ہیں۔
ایڈیشنل ڈائریکٹر جنرل نے کہا کہ قومی اسمبلی نے الیکٹرانک ووٹنگ کا بل پاس کردیا ہے، ہمیں جیسے ہی اس عمل کو لاگو کرنے کی ہدایات ملیں گی، ہم الیکڑانک ووٹنگ کے حوالے سے بھی اپنا کام شروع کرسکتے ہیں لیکن ابھی اس حوالے سے کچھ بھی کہنا قبل از وقت ہوگا۔
ڈائریکٹر الیکشن کمشنر کراچی سید ندیم حیدر کا کہنا ہے کہ ووٹر لسٹوں کے تصدیقی عمل کا آغاز کردیا گیا ہے، سات نومبر سے 6 دسمبر تک تصدیقی عمل جاری رہے گا جس میں ووٹر لسٹوں میں تبدیلیاں کی جائیں گی۔
ندیم حیدر نے بتایا کہ انتقال کر جانے والے افراد اور پتے تبدیل کرانے والے افراد کی ووٹر لسٹوں سے منتقلی کی جائے گی اور انتخابی فہرستوں کی تیاری اہم مرحلہ ہے جبکہ عوام اس سلسلے میں عملے سے تعاون کریں۔
انہوں نے شہریوں سے اپیل کی ہے کہ عوام اپنے کوائف کی درستگی کرانے میں آگے آئیں، ابھی الیکشن کمیشن کے عملے کو کراچی کے پوش علاقوں میں عوام کے عدم تعاون کی شکایات درپیش ہیں۔
انہوں نے کہا کہ انتخابی فہرستیں اہم درجہ رکھتی ہیں یہ پہلا مرحلہ ہے اس لسٹ کو اپ ڈیٹ کرکے دوبارہ شائع کیا جائے یہ الیکشن کمیشن کے دفاتر میں آویزاں کردی جائے گی اور ڈسپلے سینٹرز ہر سرکاری اسکول میں قائم کیے جائیں گے۔
ریجنل الیکشن کمشنر میلر نوید عزیز نے کہا کہ عوام الیکشن کمیشن کے ساتھ بھرپور تعاون کریں، یہ آپ کے مستقبل کا مسئلہ ہے، عملے کے ساتھ تعاون ضروری ہے، کراچی میں اب تک 87 لاکھ ووٹرز رجسٹرڈ ہیں۔
