راولپنڈی: عوامی مسلم لیگ کے سربراہ اور سابق وزیر داخلہ شیخ رشید نے امپورٹڈ حکومت کا وفاقی تحقیقاتی ادارے (ایف آئی اے)، قومی احتساب بیورو (نیب) اور اینٹی نارکوٹکس فورس (اے این ایف پر دباؤ ڈالنا شرمناک قرار دیدیا ہے۔
تفصیلات کے مطابق سابق وزیرداخلہ شیخ رشید نے سماجی رابطوں کی ویب سائٹ ٹوئٹر پر جاری پیغام میں لکھا ’جو امپورٹڈ حکومت اپنے کیسز کے خاتمے کیلئے ایف آئی اے، نیب اور اے این ایف پر دباؤ ڈال رہی ہے، جو شرمناک اور افسوسناک ہے۔ سپریم کورٹ کا سوموٹو لینا ایک تاریخی سنہرا فیصلہ ہے۔ اب اداروں اور عدلیہ پر اہم ذمہ داری آ جاتی ہے تاکہ بیورو کریسی دیانت دارانہ اور ایمان دارانہ فیصلے کر سکے۔‘
جو امپورٹڈ حکومت اپنے کیسز کے خاتمے کے لیے ایف آی اے ،نیب اور اے این ایف پر دباؤ ڈال رہی ہے جو شرم ناک اور افسوس ناک ہے۔سپریم کورٹ کا سو موٹو لینا ایک تاریخی سنہرا فیصلہ ہے۔اب اداروں اور عدلیہ پر اہم ذمہ داری آجاتی ہے تاکہ بیورو کریسی دیانت دارانہ اور ایمان دارانہ فیصلے کر سکے
— Sheikh Rashid Ahmed (@ShkhRasheed) May 19, 2022
واضح رہے کہ گزشتہ روز سپریم کورٹ آف پاکستان نے تفتیشی اداروں میں حکومتی مداخلت اور افسران کی تبدیلی پر ازخود نوٹس لیا تھا جس کی سماعت چیف جسٹس آف پاکستان جسٹس عمر عطاءبندیال کی سربراہی میں 5 رکنی بینچ کرے گا۔
جج کے نوٹ میں کہا گیا کہ کریمنلز معاملات میں حکومتی عہدوں پر موجود لوگ مداخلت کر رہے ہیں، خدشہ ہے کہ اس مداخلت سے پراسیکیوشن کے معاملات پر اثرانداز ہوا جا سکتا ہے۔
جج کا نوٹ میں کہنا تھا کہ ٹیمپرنگ اور شہادتیں غائب ہونے کا خدشہ ہے، ایسے اقدامات اور میڈیا رپورٹس کریمنلز جسٹس سسٹم کی اہمیت کم کرنے کی کوشش ہے، اس سے ملک میں قانون اور آئین کی حکمرانی اور عوام کا اعتماد مجروح ہو رہا ہے۔
