کورونا وائرس کے باعث ایشیاءکپ ٹی 20 بھی ملتوی کر دیا گیا

کولمبو: عالمگیر موذی وباءکورونا وائرس کے باعث رواں سال سری لنکا میں شیڈول ایشین کرکٹ کونسل (اے سی سی) ایشیاءکپ ٹی 20 ملتوی کر دیا گیا ہے۔ 
تفصیلات کے مطابق کورونا وائرس کے سبب ایشیا کپ ٹی 20 بھی ملتوی کردیا ہے جو آئندہ مہینے سری لنکا میں شیڈول تھا۔ سری لنکن کرکٹ بورڈ کے سربراہ کا کہنا ہے کہ کورونا وائرس کے سبب ایشیاءکپ کا انعقاد ممکن نہیں ہے۔
یاد رہے کہ رواں سال فروری میں پاکستان کرکٹ بورڈ (پی سی بی) کے چیئرمین احسان مانی کا کہنا تھا کہ لگتا ہے سری لنکا میں ہونے والا ایشیا کپ نہیں ہو گا اور ممکن ہے کہ اسے 2023ءتک ملتوی کرنا پڑے جبکہ اس کی وجہ یہ بتائی تھی کہ جون میں انٹرنیشنل کرکٹ کونسل (آئی سی سی) ٹیسٹ چیمپین شپ کا فائنل کھیلا جانا ہے۔ 
واضح رہے کہ گزشتہ سال بھی کورونا وائرس کے باعث ایشیاءکپ ملتوی کیا گیا اور 2021ءیعنی رواں سال سری لنکا میں شیڈول کیا گیا تھا تاہم اب ایک مرتبہ پھر اسے ملتوی کر دیا گیا ہے۔