جدہ: وزیراعظم پاکستان شہباز شریف اپنے 4 روزہ سرکاری دورے پر سعودی عرب پہنچ گئے، جہاں ان کا شاندار استقبال گورنر جدہ شہزادہ سعود بن عبداللہ بن جلاوی اور پاکستانی سفیر احمد فاروق نے جدہ ایئرپورٹ پر کیا۔
وزیراعظم کے دورے کا مقصد سعودی عرب کے ساتھ دو طرفہ تعلقات کو مزید مستحکم کرنا، معاشی تعاون بڑھانا اور دونوں ممالک کے درمیان سرمایہ کاری کے شعبے میں تعاون کو فروغ دینا ہے۔ وزیراعظم 19 سے 22 مارچ تک سعودی قیادت کے ساتھ ملاقاتیں کریں گے۔
وزیراعظم کے ہمراہ وزیر خارجہ سینیٹر اسحاق ڈار، وزیر اعلیٰ پنجاب مریم نواز اور دیگر وفاقی وزرا و اعلیٰ حکام بھی سعودی عرب پہنچے ہیں۔ اس دورے کے دوران وزیراعظم سعودی ولی عہد محمد بن سلمان سے ملاقات کریں گے، جس میں تجارت، اقتصادی شراکت داری اور دیگر اہم مسائل پر بات چیت ہوگی۔ ملاقاتوں میں مشرق وسطیٰ کی بدلتی ہوئی صورت حال اور امت مسلمہ کے مسائل پر بھی گفتگو کی جائے گی۔