اسلام آباد : عالمی بینک نے پاکستان کے لیے 10 کروڑ 20 لاکھ ڈالرز قرض کی منظوری دے دی ہے، جس کا مقصد موسمیاتی تبدیلی سے متاثرہ غریب کاشتکاروں کی مدد کرنا ہے۔ یہ رقم موسمیاتی تبدیلیوں سے متاثرہ افراد کو چھوٹے قرضے فراہم کرنے کے لیے استعمال کی جائے گی۔
عالمی بینک کی جانب سے جاری اعلامیے میں کہا گیا ہے کہ اس قرضے کا مقصد متاثرہ افراد کی آمدن میں اضافہ کرنا ہے اور یہ رقم عالمی بینک کے 10 سالہ کنٹری پارٹنر شپ پروگرام کا حصہ ہے۔ اس منصوبے سے چھوٹے کاروباروں اور دیہی علاقوں میں مالیاتی شمولیت کو فروغ دینے میں مدد ملے گی۔
ورلڈ بینک کے کنٹری ڈائریکٹر نے کہا کہ مائیکرو فنانس غریب طبقے کی مالی مدد کے لیے اہم ذریعہ ہے اور اس منصوبے سے 10 لاکھ خواتین سمیت مجموعی طور پر 18 لاکھ 90 ہزار افراد مستفید ہوں گے۔ انہوں نے مزید بتایا کہ پاکستان میں عالمی بینک کے تعاون سے 54 منصوبے جاری ہیں اور پاکستان میں عالمی بینک کی کل سرمایہ کاری 15.7 ارب ڈالر تک پہنچ گئی ہے۔
