لاہور : وزیراعلیٰ پنجاب مریم نواز شریف نے ڈیجیٹل لرننگ ڈے پر اپنے پیغام میں کہا کہ ڈیجیٹل لرننگ کے دور میں ترقی ٹیکنالوجی اور جدید تعلیم سے جڑی ہوئی ہے۔
انہوں نے کہا کہ پنجاب حکومت اپنے نوجوانوں کو جدید دنیا کے تقاضوں سے ہم آہنگ کرنے کے لیے مختلف مواقع فراہم کر رہی ہے، اور سی ایم لیپ ٹاپ سکیم پنجاب کے طلبہ کے لیے ایک انقلابی قدم ثابت ہو گا۔ مریم نواز نے مزید کہا کہ پنجاب میں نوجوانوں کو انٹرنیشنل مارکیٹ بیسڈ ایڈوانس آئی ٹی ٹریننگ پروگرامز فراہم کیے جا رہے ہیں۔
ان پروگرامز میں مصنوعی ذہانت (AI)، سافٹ ویئر ڈویلپمنٹ اور فری لانسنگ جیسے کورسز شامل ہیں۔ ان کا کہنا تھا کہ عالمی جاب مارکیٹ کے تقاضوں کے مطابق فری لانسرز کے لیے آئی ٹی کورسز سرٹیفکیشن بھی کرائی جا رہی ہے۔وزیراعلیٰ نے کہا کہ پنجاب کے سرکاری سکولوں میں سمارٹ کلاس رومز اور ڈیجیٹل لیبز بنائی جا رہی ہیں تاکہ روایتی تعلیم کو جدید ٹیکنالوجی سے زیادہ مؤثر اور دلچسپ بنایا جا سکے۔
انہوں نے لاہور میں پاکستان کے پہلے منفرد نواز شریف آئی ٹی سٹی کے قیام کا ذکر کیا، جس میں ٹوئین ٹاورز اسی سال مکمل ہو جائیں گے۔ نواز شریف آئی ٹی سٹی میں پلگ اینڈ پلے کال سینٹر ہب بھی قائم کیا جائے گا۔ مریم نواز نے کہا کہ نواز شریف آئی ٹی سٹی میں نوجوانوں کو آئی ٹی ایجوکیشن اور روزگار کے نئے مواقع فراہم کیے جائیں گے، اور عالمی سطح کی انفارمیشن ٹیکنالوجی یونیورسٹیاں بھی یہاں اپنے کیمپس قائم کرنے میں دلچسپی دکھا رہی ہیں۔ انہوں نے کہا کہ ڈیجیٹائزیشن کے ذریعے نوجوانوں کو خودمختاری، ترقی اور کامیابی کی راہ پر گامزن کیا جا رہا ہے۔