اسلام آباد : وزیراعظم شہباز شریف آج سعودی عرب کے 3 روزہ دورے پر روانہ ہوں گے۔ دفتر خارجہ کے ترجمان کے مطابق، وزیراعظم 19 سے 22 مارچ تک سعودی عرب میں رہیں گے۔
اس دورے کا مقصد دونوں ممالک کے درمیان دو طرفہ تعلقات کو مستحکم کرنا، اقتصادی تعاون بڑھانا اور سرمایہ کاری کے مواقع بڑھانا ہے۔ اس دورے میں نائب وزیراعظم اسحاق ڈار بھی وزیراعظم کے ہمراہ ہوں گے، جبکہ اہم وفاقی وزرا اور سینئر سرکاری افسران بھی اس دورے کا حصہ ہوں گے۔
ترجمان نے کہا کہ دورے کے دوران وزیراعظم شہباز شریف سعودی ولی عہد اور وزیراعظم محمد بن سلمان سے ملاقات کریں گے، جس میں تجارت اور مختلف شعبوں میں تعاون کے امکانات پر بات چیت کی جائے گی۔ ملاقات میں مشرق وسطیٰ کی صورتحال اور فلسطین کے حالات پر بھی گفتگو کی جائے گی۔