کوئٹہ : بولان میں دہشت گردی کا نشانہ بننے والی جعفر ایکسپریس کی بوگیاں 8 روز بعد کوئٹہ پہنچا دی گئی ہیں۔ تباہ حال کوچز سے 3 دستی بم برآمد ہوئے ہیں، جنہیں ناکارہ بنا دیا گیا۔
ریلوے حکام کے مطابق، کوئٹہ منتقل کی گئی بوگیوں پر گولیوں کے نشان ہیں اور بیشتر کھڑکیوں کے شیشے ٹوٹے ہوئے ہیں۔ حکام کا کہنا ہے کہ ان بوگیوں کو مرمت کے بعد دوبارہ فعال کر دیا جائے گا تاکہ یہ سفر کے قابل بن سکیں۔ ریلوے پولیس حکام کے مطابق، متاثرہ بوگیوں سے 3 دستی بم ملے تھے جنہیں فوری طور پر ناکارہ بنا دیا گیا۔ یہ بوگیاں کچھی کے علاقے مشکاف سے کوئٹہ منتقل کی گئیں تھیں۔
یاد رہے کہ 11 مارچ کو بولان میں جعفر ایکسپریس پر دہشت گردوں نے حملہ کیا تھا جس میں متعدد شہری اور اہلکار شہید ہوگئے تھے۔ فورسز نے فوری طور پر ایکشن لیتے ہوئے ہائی جیک کی گئی ٹرین اور مسافروں کو بحفاظت بازیاب کرالیا تھا، اور اس آپریشن میں تقریباً 50 دہشت گرد مارے گئے تھے۔
