غزہ : غزہ میں جنگ بندی معاہدے کا طے شدہ وقت شروع ہو چکا ہے لیکن اس کے اطلاق میں تاخیر ہو رہی ہے۔ اسرائیلی میڈیا کے مطابق حماس کی جانب سے یرغمالیوں کی فہرست فراہم کرنے میں تاخیر کا سامنا ہے، جس کے بغیر جنگ بندی کا آغاز نہیں ہو گا۔ اسرائیلی فوج کے ترجمان نے بھی کہا ہے کہ جب تک حماس اپنی ذمے داریوں کو پورا نہیں کرتی، جنگ بندی مؤثر نہیں ہو گی۔
حماس کی طرف سے جواب میں کہا گیا کہ یرغمالیوں کے نام جاری کرنے میں تکنیکی خرابی کی وجہ سے تاخیر ہو رہی ہے۔ عرب میڈیا کی رپورٹس کے مطابق اسرائیلی فوج جنوبی غزہ کے شہر رفح سے نکلنا شروع کر چکی ہے اور فوجیں مصر کی سرحد کے ساتھ فلاڈیلفی راہداری پر موجود رہیں گی۔
دوسری جانب غزہ میں اسرائیلی جنگ کی تباہی کا منظر بھی افسوسناک ہے، جہاں پندرہ ماہ سے جاری جنگ کے دوران بچوں اور خواتین سمیت 47 ہزار 899 فلسطینی شہید ہو چکے ہیں، ایک لاکھ 10 ہزار سے زائد زخمی ہیں اور ہزاروں فلسطینی ابھی تک لاپتہ ہیں۔ غزہ کی بستیاں اسرائیل کی بمباری سے تباہ ہو چکی ہیں، اور ہزاروں فلسطینی اپنے تباہ شدہ گھروں کو دوبارہ آباد کرنے کے منتظر ہیں۔
