کوئٹہ : بلوچستان کے مختلف علاقوں میں موسلادھار بارش اور برفباری کے باعث سردی کی شدت میں اضافہ ہو گیا ہے۔ وادی زیارت اور اس کے گرد و نواح میں تین انچ تک برف پڑ چکی ہے، جبکہ چمن، قلعہ عبداللہ اور پشین کے بالائی علاقوں میں برفباری سے رابطہ سڑکوں کے متاثر ہونے کا خدشہ ہے۔
محکمہ موسمیات کے مطابق چمن اور اس کے گرد و نواح میں بھی شدید بارشیں ہوئی ہیں، جس کے نتیجے میں نشیبی علاقے زیر آب آ گئے ہیں۔ بارشوں کی وجہ سے این 25 چمن کوئٹہ کراچی شاہراہ پر ایمرجنسی نافذ کر دی گئی ہے۔
محکمہ موسمیات نے مزید بارشوں کی پیشنگوئی کی ہے اور چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر اور اورکزئی میں بارشوں کی توقع ظاہر کی ہے۔ ان موسمی حالات کے باعث علاقے میں سردی کی شدت میں مزید اضافہ ہو سکتا ہے۔