لاہور : پنجاب کے مختلف شہروں میں شدید دھند کے باعث حد نگاہ میں کمی ہو گئی ہے جس کے نتیجے میں متعدد موٹر ویز بند کر دی گئی ہیں۔ ترجمان موٹر وے پولیس کے مطابق، موٹر وے ایم 2 لاہور سے کوٹ مومن اور ایم 3 لاہور سے ملتان تک بند ہیں۔
ایم فور پر پنڈی بھٹیاں سے ملتان تک ٹریفک کا داخلہ بھی ممنوع کر دیا گیا ہے جبکہ ایم 5 پر ملتان سے اوچ شریف تک انٹری بند کر دی گئی ہے۔ لاہور سیالکوٹ موٹر وے ایم 11 بھی دھند کے سبب بند ہے، جس سے قومی شاہراہوں پر ٹریفک کی روانی متاثر ہو رہی ہے۔
موٹر وے پولیس نے ڈرائیور حضرات کو ہدایت دی ہے کہ وہ اپنی گاڑیوں میں آگے اور پیچھے فوگ لائٹس کا استعمال کریں تاکہ دھند کے دوران دیگر گاڑیوں کو بہتر طور پر دیکھا جا سکے۔ اس کے علاوہ، شہریوں کو غیر ضروری سفر سے گریز کرنے کی بھی درخواست کی گئی ہے تاکہ کسی بھی حادثے سے بچا جا سکے۔
