اسلام آباد: وزیراعظم شہباز شریف نے کہا ہے کہ پاکستان میں ڈیجیٹل کرنسی کو ریگولیٹ کرنے کے معاملے پر مشاورت جاری ہے، جس کا مقصد اس نئے مالیاتی آلے کو بہتر طور پر منظم کرنا ہے۔
وزیراعظم کی صدارت میں اقتصادی مشاورتی کونسل کا اجلاس منعقد ہوا، جس میں کونسل ارکان نے حکومت کی معاشی پالیسیوں پر مکمل اعتماد کا اظہار کرتے ہوئے مستقبل کے لئے کئی اہم تجاویز پیش کیں، جسے وزیرِ اعظم نے خوش دلی سے قبول کیا۔
وزیراعظم نے کہا کہ معاشی استحکام کسی ایک فرد کی کوششوں کا نتیجہ نہیں، بلکہ یہ ایک مکمل ٹیم کی محنت کا ثمر ہے۔ انہوں نے مزید کہا کہ ملک میں مقامی صنعت کو مضبوط بنایا جائے گا تاکہ ہماری برآمدات عالمی مارکیٹ میں بھرپور مقابلہ کر سکیں۔
اجلاس کے دوران، وزیراعظم نے کہا کہ حکومت نے ملکی معیشت کی پائیدار ترقی کے لئے کئی اقدامات کیے ہیں، جن میں صنعتی ترقی، زراعت، آئی ٹی کے شعبے کی بہتری اور روزگار کی فراہمی شامل ہے۔ اس کے علاوہ، حکومت گرین ڈیٹا سینٹرز کے قیام کے لیے بھی سرگرم ہے۔
انہوں نے ٹیلی کمیونیکیشن سروسز کی بہتری اور دور دراز علاقوں میں انٹرنیٹ کی رسائی کے ذریعے آئی ٹی برآمدات میں اضافے کی حکمت عملی پر بھی بات کی۔ اس کے ساتھ ہی، ڈیجیٹل کرنسی کی ریگولیشن کے حوالے سے حکومت کی مشاورت کا عمل بھی جاری ہے۔
شرکاء نے وزیراعظم کی قیادت میں ہونے والی معاشی اصلاحات کی تعریف کرتے ہوئے کہا کہ ملک میں پہلی بار ادارہ جاتی اصلاحات پر حقیقی عمل درآمد ہو رہا ہے اور حکومتی ٹیم کی معاشی پالیسیوں کو کاروباری برادری اور عالمی اداروں سے مثبت پذیرائی مل رہی ہے۔
اس اجلاس میں وفاقی وزرا اور اعلیٰ حکام بھی شریک تھے جنہوں نے حکومت کے اقدامات کو سراہا۔
