راولپنڈی: پاک بحریہ اور رائل سعودی نیول فورسز کی سپیشل آپریشن فورسز کے درمیان مشترکہ مشق ’’افعی الساحل‘‘ کراچی میں کامیابی کے ساتھ اختتام پذیر ہوگئی۔
پاک فوج کے شعبہ تعلقات عامہ (آئی ایس پی آر) کے مطابق، کمانڈر کوسٹ رئیر ایڈمرل فیصل امین نے سعودی اور پاکستانی بحری افواج کے اعلیٰ حکام کے ساتھ مشق کے آخری مرحلے کا معائنہ کیا۔
مشق کے دوران رائل سعودی بحریہ اور پاک بحریہ کی سپیشل آپریشن فورسز کی ٹیموں نے جدید فوجی آپریشنز کی تربیت میں حصہ لیا، جن میں آر پی جی اور مشین گن فائرنگ، کلوز کوارٹرز کمبیٹ، پریکٹیکل ریپیلنگ، یرغمالیوں کی بازیابی، وی بی ایس ایس، ای او ڈی ڈرل، مشن پلاننگ اور ایریا کلیئرنس جیسے جدید طریقہ کار شامل تھے۔
آئی ایس پی آر کے مطابق، اس مشق کا مقصد دونوں بحری افواج کے مابین آپریشنل ہم آہنگی کو مزید بہتر بنانا اور دونوں ممالک کی میری ٹائم سکیورٹی کی صلاحیتوں کو مضبوط بنانا تھا۔