کراچی: شائقین کرکٹ کا انتظار ختم ہو گیا، کیونکہ 29 برس بعد پاکستان کی سرزمین پر آئی سی سی ایونٹ کا آغاز ہونے جا رہا ہے۔ آئی سی سی چیمپئنز ٹرافی کا آغاز آج سے ہو رہا ہے، اور 8 بہترین ٹیموں کے درمیان چیمپئن بننے کی جنگ شروع ہو گی۔
چیمپئنز ٹرافی کے افتتاحی میچ میں میزبان پاکستان اور نیوزی لینڈ کی ٹیمیں آج نیشنل اسٹیڈیم کراچی میں مدمقابل ہوں گی۔ تمام تیاریاں مکمل کر لی گئی ہیں، اور اب صرف شائقین کو ٹیموں کو میدان میں ایکشن میں دیکھنے کا انتظار ہے۔ کرکٹ شائقین کی بڑی تعداد اس میچ کو دیکھنے کے لیے کراچی کے نیشنل اسٹیڈیم کا رخ کرے گی۔
اس موقع پر سکیورٹی کے سخت انتظامات کیے گئے ہیں، اور شائقین کرکٹ کے لیے یہ جاننا ضروری ہے کہ وہ اسٹیڈیم میں کون سی چیزیں نہیں لا سکتے۔
کراچی نیشنل اسٹیڈیم میں شائقین کے لیے ممنوعہ اشیاء درج ذیل ہیں۔
پاور بینک : نیشنل اسٹیڈیم میں شائقین کو اپنے ساتھ پاور بینک لے جانے کی اجازت نہیں ہوگی، سکیورٹی اہلکار پاور بینک سمیت کسی کو اسٹیڈیم میں داخل ہونے نہیں دیں گے۔
ائیرپوڈز، ہیڈفونز، اور ہینڈ فریز : اسٹیڈیم میں شائقین کو ائیرپوڈز، ہیڈ فونز یا ہینڈ فریز لے جانے کی اجازت نہیں ہے۔
چھالیہ، پان، گٹکا : شائقین کو نیشنل اسٹیڈیم میں چھالیہ، پان یا گٹکا ساتھ لے جانے کی اجازت نہیں ہے۔
کھانے پینے کی اشیاء : اسٹیڈیم میں پانی کی بوتل، چپس، کولڈرنک وغیرہ لے جانے کی اجازت نہیں ہوگی۔
آئی سی سی چیمپئنز ٹرافی میں پاکستان اور نیوزی لینڈ کے درمیان افتتاحی میچ پاکستانی وقت کے مطابق دوپہر 2 بجے شروع ہوگا۔ اس ایونٹ کے تمام میچز جیوسوپر سے براہ راست نشر ہوں گے۔ شائقین کرکٹ سے درخواست ہے کہ وہ ان ہدایات پر عمل کریں تاکہ اسٹیڈیم میں ان کی انٹری میں کسی قسم کی پریشانی کا سامنا نہ ہو اور وہ ایونٹ کا مکمل لطف اٹھا سکیں۔
