سکھر: پاکستان پیپلزپارٹی کے سینئر رہنما سید خورشید شاہ نے کہا ہے کہ آئین و قانون کے دائرے میں رہ کر احتجاج کرنا ہر سیاسی جماعت کا جائز حق ہے، لیکن اگر احتجاج کو تخریب کاری میں تبدیل کیا گیا تو ایسا ہرگز برداشت نہیں کیا جائے گا۔
سکھر میں میڈیا سے گفتگو کرتے ہوئے خورشید شاہ نے کہا کہ پی ٹی آئی اگر احتجاج کرنا چاہے تو ہمیں کوئی اعتراض نہیں، کیونکہ یہ ان کا قانونی اور آئینی حق ہے۔ انہوں نے مزید کہا کہ اگر احتجاج کے دوران لوگ گرفتار ہوں تو جیلیں خالی پڑ جائیں گی۔
خورشید شاہ نے مولانا فضل الرحمان کی 26ویں آئینی ترمیم پر ووٹنگ کا حوالہ دیتے ہوئے کہا کہ پارلیمنٹ کبھی بھی ایسی ترمیم منظور نہیں کرے گی جو انسانی حقوق کی خلاف ورزی کرے۔ انہوں نے کہا کہ پیپلزپارٹی کا دریائے سندھ کے پانی کی تقسیم کے معاملے پر مؤقف واضح ہے، اور ہم کبھی بھی اس پر سمجھوتہ نہیں کریں گے۔ ان کا کہنا تھا کہ پاکستان کے مفاد میں نیا "پینڈورا باکس" نہیں کھولا جانا چاہیے۔
وی پی این کے حوالے سے خورشید شاہ نے کہا کہ یہ غیر شرعی عمل ہے، اور جب تک قانون اس کی اجازت نہ دے، ایسی کوئی چیز نہیں ہو سکتی۔ انہوں نے یہ بھی کہا کہ وہ خود موبائل فون کا استعمال نہیں کرتے، تو وی پی این کا استعمال کیسے کر سکتے ہیں۔ ان کا یہ بھی کہنا تھا کہ ان کے ٹویٹر اکاؤنٹ کا انتظام کون کر رہا ہے، انہیں اس کا علم نہیں اور نہ ہی وہ اس بارے میں فکر مند ہیں۔ آخر میں، خورشید شاہ نے شہید صحافی جان محمد کے قاتلوں کی گرفتاری نہ ہونے پر افسوس کا اظہار کیا۔