اسلام آباد: پاکستان نے عالمی برادری سے مقبوضہ کشمیرمیں بھارتی ریاستی دہشتگردی کا نوٹس لینے کا مطالبہ کیا ہے۔
ترجمان دفترخارجہ کا بیان میں کہنا تھا کہ عالمی برادری مقبوضہ کشمیرمیں بھارتی ریاستی دہشتگردی کا فوری نوٹس لے۔ مقبوضہ کشمیرمیں مزید پانچ کشمیریوں کے ماورائے عدالت قتل کی شدیدمذمت کرتے ہیں۔
ترجمان کا مزید کہنا تھا کہ مقبوضہ کشمیر میں معصوم شہری، خواتین، بچے اور بزرگ بھارتی افواج کی ریاستی دہشت گردی سے محفوظ نہیں ۔کئی واقعات میں شہید کشمیریوں کی میتیں لواحقین کے حوالے نہ کرنے کا عمل ظالمانہ اورغیرانسانی ہے۔
قابض بھارتی افواج کے ہاتھوں بے گناہ کشمیریوں کے قتل کا سلسلہ جاری ہے۔قابض افواج یکم اکتوبرسے اب تک جعلی مقابلوں یا نام نہاد سرچ آپریشن میں کم ازکم30کشمیریوں کوشہید کرچکی ہیں۔
ترجمان کا کہنا تھا کہ بھارتی قابض افواج کے ہاتھوں کشمیریوں کی شہادتیں ناقابل تردید حقائق کی بھی توثیق کرتے ہیں جو پاکستان نے حال ہی میں ایک جامع ڈوزیئر میں فراہم کیے ہیں۔ ڈوزیئر میں مقبوضہ کشمیر میں بھارتی قابض افواج کی جانب سے انسانی حقوق کی خلاف ورزیوں اور جنگی جرائم کو بے نقاب کیا گیا ہے۔
خیال رہے کہ آج بھی پانچ کشمیری نوجوانوں کوضلع کلگام میں نام نہاد سرچ آپریشن کی آڑ میں شہید کیا گیا۔بھارتی فوج نے کلگام اورقریبی علاقوں کی ناکہ بندی کرکے لوگوں کوگھروں میں محصورکردیا۔موبائل اورانٹرنیٹ سروس بھی بند کردی گئی۔
قابض بھارتی فورسزنے گھرگھرتلاشی کے دوران پانچ نوجوانوں کو گرفتار کر لیا۔ بھارتی فوج کے ہاتھوں 2روزمیں 9کشمیری نوجوان شہید ہو چکے ہیں۔ایک روز قبل بھارتی فورسز کی فائرنگ سے حیدرہ پورہ میں چارکشمیری نوجوان شہید ہوئے تھے۔
بھارتی فورسز نے ظلم کی انتہا کرتے ہوئے شہدا کی لاشیں بھی خاندان کے حوالے نہیں کیں۔شہدا کے لواحقین لاشوں کے حصول کے لئے احتجاج کررہے ہیں۔