اسلام آباد: کرغزستان کے نائب وزیرخارجہ نے کہا ہے کہ کرغز حکام نے صورتحال پر قابو پا لیا۔
کرغزستان کے نائب وزیرخارجہ کا کہناہے کہ کرغز پولیس تمام ہاسٹلز کو سیکیورٹی فراہم کر رہی ہے۔ معاملے کی براہراست نگرانی کرغز صدر کر رہے ہیں۔ کر غزستان حکومت کل کے حملے کےمجرموں کیخلاف کارروائی کرے گی۔
وزیر خارجہ اسحٰق ڈار کی ہدایت پر کرغزستان میں پاکستانی سفیر حسن ضیغم نے کرغز نائب وزیر خارجہ سے ملاقات کی۔ملاقات میں سفیر نے دارالحکومت بشکیک میں پاکستانی طلبہ کی صورتحال اور ان کے اہل خانہ کے خدشات سے آگاہ کیا۔
ترجمان دفتر خارجہ کے مطابق پاکستانی سفیر حسن ضیغم نے کرغزستان حکومت پر زور دیا کہ وہ پاکستانی شہریوں کے تحفظ کو ترجیح دیں۔
اس موقع پر کرغزستان کے نائب وزیر خارجہ نے کہا کہ بشکیک میں حکام نے صورتحال پر قابو پالیا ہے اور حالات اب معمول پر آگئے ہیں، جب کہ مقامی پولیس تمام ہاسٹلز کو بھرپور سیکیورٹی فراہم کر رہی ہے۔
انہوں نے کہا کہ کچھ پاکستانیوں سمیت 14 غیر ملکی شہریوں کو ابتدائی طبی امداد فراہم کر دی گئی ہیں، اس وقت ایک پاکستانی شہری زیر علاج ہے۔
نائب وزیر خارجہ کا مزید کہنا تھا کہ کرغزستان کے صدر خود اس معاملے کی براہ راست نگرانی کررہے ہیں اور حکومت کل کے حملے کے مجرموں کے خلاف قانونی کارروائی کرے گی۔
خیال رہے کہ وزیر خارجہ اسحٰق ڈار نے بشکیک میں مقامی افراد کے حملے میں پاکستانی طلبہ کے زخمی ہونے کے معاملے پر دفتر خارجہ کو نظر رکھنے کی ہدایت کرتے ہوئے پاکستانی شہریوں کی مکمل مدد اور سہولت فراہم کرنے کا کہا تھا۔