اسلام آباد : پاکستان کی پارلیمنٹ کی قومی سلامتی کمیٹی کا اجلاس آج منعقد ہو رہا ہے، جس میں ملکی سکیورٹی صورتحال پر تفصیل سے گفتگو کی جائے گی۔ عسکری قیادت پارلیمانی کمیٹی کو موجودہ سکیورٹی صورتحال سے آگاہ کرے گی، اور انٹیلی جنس اداروں کے سربراہ پارلیمانی رہنماؤں کو ملکی داخلی و خارجی امور پر بریفنگ دیں گے۔ اجلاس میں دہشت گردوں کے خلاف آپریشنز میں تیزی لانے سے متعلق فیصلے متوقع ہیں۔
قومی سلامتی کمیٹی کے اجلاس کیلئے مدعو کردہ رہنماؤں کی فہرست بھی سامنے آ گئی ہے، جس میں چاروں صوبوں کے وزرائے اعلیٰ اور گورنرز کو بھی دعوت دی گئی ہے۔ اس اجلاس میں وزیراعظم شہباز شریف سمیت 122 ارکان شریک ہوں گے، اور اجلاس میں سپیکر قومی اسمبلی، چیئرمین سینیٹ اور ڈپٹی چیئرمین سینیٹ بھی شریک ہوں گے۔
مدعو کردہ رہنماؤں میں مولانا فضل الرحمان، عمر ایوب، مولانا عبدالغفور حیدری، صاحبزادہ حامد رضا، فاروق ایچ نائیک، سینیٹر راجا ناصر عباس، محمود اچکزئی، اختر مینگل، اسد قیصر اور زرتاج گل شامل ہیں۔ اس کے علاوہ، ایمل ولی خان، خالد مقبول صدیقی، خالد مگسی، فاروق ستار اور مصطفیٰ کمال بھی اجلاس میں شریک ہوں گے۔ آزاد کشمیر اور گلگت بلتستان کی سیاسی قیادت بھی مدعو کی گئی ہے۔ اجلاس میں سیکرٹری کابینہ، چاروں صوبائی چیف سیکرٹریز، آئی جیز اور دیگر متعلقہ اداروں کے سیکرٹریز بھی مدعو کئے گئے ہیں۔
