سینٹ لوشیا: آئی سی سی ٹی ٹوینٹی ورلڈ کپ 2024ء کے میچ میں ویسٹ انڈیز نے افغانستان کو 104 رنز سے شکست دے دی۔افغانستان نے ٹاس جیت کر میزبان ٹیم ویسٹ انڈیز کو بیٹنگ کرنے کی دعوت دی، دونوں ٹیمیں سینٹ لوشیا کے ڈیرن سیمی کرکٹ سٹیڈیم میں مدمقابل تھیں۔
افغانستان کی دعوت پر ویسٹ انڈیز نے بیٹنگ شروع کی لیکن شروعات اچھی نہ ہوئی، 23 رنز کے مجموعی سکور پر اوپنر برینڈن کنگ 7 رنز بنا کر بولڈ ہو گئے، ان کے بعد آنے والے نکولس پورن نے جونسن چارلس کے ساتھ مل کر افغان باؤلرز کی خوب درگت بنائی۔نکولس پورن نے 53 گیندوں پر 98 رنز بنا کر ٹیم کی پوزیشن مستحکم کر دی جبکہ جونسن چارلس 43 رنز کی اننگز کھیل کر نمایاں رہے، چوتھے اور پانچویں نمبر پر آنے والے شائی ہوپ اور روون پاول نے بھی میچ کا مجموعی سکور آگے بڑھانے میں اپنا بھرپور کردار ادا کیا۔
روون پاول اور شائی ہوپ بالترتیب 26 ، 25 رنز بنا کر آؤٹ ہو گئے، یوں میزبان ویسٹ انڈیز نے مقررہ اوورز میں 218 رنز بنائے، افغانستان کی جانب سے گلبدین نائب نے 2 کھلاڑیوں کو آؤٹ کیا جبکہ عظمت اللہ عمر زئی اور نوین الحق نے ایک ایک وکٹ حاصل کی۔
بڑے ہدف کے جواب میں افغانستان کی کی بیٹنگ مایوس کن رہی، اوپنز رحمان اللہ گرباز پہلے ہی اوور کی تیسری بال پر کیچ دے کر پویلین لوٹ گئے، ابراہیم زادران کا ساتھ دینے کیلئے آنے والے گلبدین نائب بھی 10 بالز کی مہمان ثابت ہوئے اور ایل بی ڈبلیو آؤٹ ہو گئے۔اوپنر ابراہیم زادران اور چوتھے نمبر کے بیٹر عظمت اللہ عمرزئی نے میزبان ٹیم کیخلاف بھرپور مزاحمت کی لیکن کسی کام نہ آئی، دونوں بالترتیب 38 اور 23 رنز بنا کر نمایاں رہے، راشد خان نے 18، کریم جنت نے 14 سکور کیے، نوین الحق 4، نور احمد 2، محمد نمبر 1 ہی بنا پائے۔
ویسٹ انڈیز کی جانب سے عبید مکائے نے شاندار باؤلنگ کرتے ہوئے 3 اوورز میں 14 رنز دے کر 3 کھلاڑیوں کو آؤٹ کیا، عقیل حسین نے 2 اور گڈکیش موتی نے 2، 2 وکٹیں حاصل کیں، آندرے رسل اور الزاری جوزف نے ایک ایک کھلاڑی کو پویلین کی راہ دکھائی۔