لاہور : پنجاب کے بیشتر علاقے شدید دھند کی لپیٹ میں ہیں، جس کے باعث مختلف موٹرویز کو ٹریفک کے لیے بند کر دیا گیا ہے۔ ترجمان موٹروے پولیس کے مطابق، شدید دھند کی وجہ سے موٹروے ایم 4 کو عبدالحکیم سے ملتان تک اور موٹروے ایم 5 کو ملتان سے ظاہر پیر تک بند کیا گیا ہے۔
ترجمان نے کہا کہ موٹرویز عوام کی حفاظت اور محفوظ سفر کو یقینی بنانے کے لیے بند کی جاتی ہیں۔ شہریوں کو دن کے اوقات میں سفر کرنے، غیر ضروری سفر سے گریز کرنے اور معلومات یا مدد کے لیے ہیلپ لائن 130 سے رابطہ کرنے کی ہدایت دی گئی ہے۔
شہریوں کو مزید ہدایت دی گئی کہ تیز رفتاری سے پرہیز کریں، اگلی گاڑی سے مناسب فاصلہ رکھیں اور دورانِ سفر فوگ لائٹس کا استعمال کریں تاکہ حادثات سے بچا جا سکے۔