کیلیفورنیا: ایلون مسک کی کمپنی ایکس اے آئی نے اپنا نیا آرٹیفیشل انٹیلی جنس (AI) ماڈل گروک 3 متعارف کرادیا، جسے اب تک کا سب سے زیادہ اسمارٹ اور طاقتور چیٹ بوٹ قرار دیا جا رہا ہے۔
ایلون مسک نے ایکس (ٹوئٹر) پر ایک پوسٹ میں دعویٰ کیا کہ گروک 3 دیگر چیٹ بوٹس کے مقابلے میں زیادہ تیز رفتار اور طاقتور ہے اور اس کی تربیت طویل عرصے تک کی گئی ہے۔ ان کے مطابق یہ چیٹ بوٹ ویب اور سوشل میڈیا پر کام کی رفتار کو دس گنا تیز بنا دے گا، یعنی جو کام پہلے ایک گھنٹے میں ہوتا تھا، وہ اب دس منٹ میں مکمل ہو سکے گا۔
ایکس اے آئی کے مطابق گروک 3 اپنے سابقہ ماڈل گروک 2 سے 10 گنا زیادہ طاقتور ہے اور کارکردگی کے لحاظ سے چیٹ جی پی ٹی 4o، گوگل جیمنائی 2 پرو اور ڈیپ سیک وی 3 جیسے جدید چیٹ بوٹس کو پیچھے چھوڑ چکا ہے۔
یہ نیا اے آئی ماڈل ایکس اے آئی کے سپر کمپیوٹر Colossus پر تیار کیا گیا ہے، جو دنیا کے چند بڑے اور طاقتور سپر کمپیوٹرز میں شمار ہوتا ہے۔
گروک 3 کے بعد گروک 3 منی بھی جلد آئے گا
کمپنی نے اعلان کیا کہ گروک 3 کے بعد جلد ہی گروک 3 منی بھی متعارف کرایا جائے گا، جو کہ محدود فیچرز کے ساتھ لیکن گروک 2 سے زیادہ برق رفتار ہوگا۔
یہ نیا چیٹ بوٹ ایکس کے پریمیئم پلس صارفین کے لیے دستیاب ہوگا، جس کے لیے صارفین کو ماہانہ 22 ڈالرز فیس ادا کرنا ہوگی۔ اس کے علاوہ ایکس اے آئی نے 30 ڈالرز کی سبسکرپشن پر مبنی سپر گروک پیکیج بھی متعارف کرایا ہے۔
ایلون مسک نے بتایا کہ گروک 3 کو مسلسل بہتر بنایا جا رہا ہے، اور صارفین روزانہ اس میں نمایاں بہتری محسوس کریں گے۔
ایکس اے آئی کی جانب سے 2024 میں ہی گروک 3 کو متعارف کرانے کا اعلان کیا گیا تھا، تاہم تاخیر کے بعد اب اسے باضابطہ طور پر لانچ کردیا گیا ہے۔
