اسلام آباد: سعودی عرب نے پاکستان کو مؤخر ادائیگی پر 10 کروڑ ڈالر کی پیٹرولیم مصنوعات کی فراہمی جاری رکھنے کا فیصلہ کیا ہے۔
وزیراعظم شہباز شریف کی زیر صدارت وفاقی کابینہ کا اجلاس وزیراعظم ہاؤس اسلام آباد میں ہوا، جس میں سعودی ولی عہد اور وزیراعظم شہزادہ محمد بن سلمان کا پاکستان کے لیے پیٹرولیم مصنوعات کی فراہمی سے متعلق اہم پیغام بھی زیر بحث آیا۔ وزیراعظم نے کابینہ کو آگاہ کیا کہ سعودی ولی عہد نے پاکستان کے لیے پیٹرولیم مصنوعات کی ماہانہ فراہمی کی تجدید کی ہے، جس کا معاہدہ مزید ایک سال کے لیے مؤخر ادائیگی کی بنیاد پر ہوگا۔
شہباز شریف نے سعودی قیادت کا شکریہ ادا کرتے ہوئے کہا کہ سعودی عرب نے ہمیشہ پاکستان کی مدد کی ہے، خاص طور پر مشکل حالات میں۔
کابینہ اجلاس میں ای آفس کے استعمال کی صورتحال پر بھی بریفنگ دی گئی، جس کے مطابق 98 فیصد وفاقی حکومت کی ڈویژنز میں ای آفس کا نفاذ ہو چکا ہے، اور 39 ڈویژنز میں یہ نظام 100 فیصد نافذ ہو چکا ہے۔ وزیراعظم نے ہدایت کی کہ بیرون ملک پاکستانی مشنز میں بھی خدمات کی فراہمی کو ڈیجیٹائز کیا جائے تاکہ غیر ملکی پاکستانیوں کو آسانی ہو۔
وزیراعظم نے مزید کہا کہ ای آفس کا نفاذ وفاقی حکومت کی تمام وزارتوں اور محکموں میں 20 مارچ 2025 تک 100 فیصد مکمل کیا جائے
