راولپنڈی: اڈیالہ جیل کے اطراف سکیورٹی کو مزید سخت کر دیا گیا ہے اور کنٹینرز لگا کر اضافی ناکے قائم کر دیے گئے ہیں۔ پولیس کا کہنا ہے کہ اڈیالہ جیل کے اطراف سرچ آپریشن جاری ہے اور جب تک یہ کارروائی مکمل نہیں ہوتی، جیل کی طرف جانے والے کسی بھی شخص کو آگے جانے کی اجازت نہیں دی جائے گی۔
سرچ آپریشن کے پیش نظر، پولیس نے اڈیالہ جیل جانے والے تمام راستوں پر کنٹینرز لگا کر اضافی ناکے قائم کر دیے ہیں۔ اس دوران سڑک سے گزرنے والی گاڑیوں کی تفصیلی تلاشی کے بعد ہی انہیں آگے جانے کی اجازت دی جا رہی ہے۔
اسی دوران، پولیس نے بانی پی ٹی آئی کی بہن علیمہ خان کی گاڑی کو جیل سے 2 کلومیٹر دور روک لیا۔ علیمہ خان نے پولیس کو بانی پی ٹی آئی سے ملاقات کے عدالتی احکامات دکھائے، جس کے بعد انہیں آگے جانے کی اجازت دے دی گئی۔
اس کے علاوہ، ایڈووکیٹ جنرل خیبر پختونخوا شاہ فیصل کو بھی اڈیالہ روڈ پر ناکے پر روک لیا گیا، جہاں پولیس اہلکاروں نے ان کی گاڑی کو آگے جانے سے روک دیا۔
یاد رہے کہ آج اڈیالہ جیل میں فیملی ملاقاتوں کا دن ہے، جس کے تحت بانی پی ٹی آئی عمران خان سے ملاقات کے لیے قاسم خان، عظمیٰ خان اور نورین نیازی جیل روانہ ہو گئے ہیں۔
