دہلی : بھارتی کرکٹ ٹیم نے آئی سی سی چیمپئنز ٹرافی 2025 کیلئے اپنی نئی رنگین جرسی کی رونمائی کی۔ کپتان روہت شرما، ویرات کوہلی، رویندر جڈیجا، ہاردک پانڈیا اور ارشدیپ سنگھ سمیت بھارتی کرکٹرز نئی جرسی میں تصاویر کھنچواتے ہوئے نظر آئے۔
اس رونمائی کے دوران، بھارتی میڈیا کی توجہ اس بات پر مرکوز رہی کہ کیا جرسی پر چیمپئنز ٹرافی کے میزبان ملک پاکستان کا نام درج ہے یا نہیں۔ بھارتی میڈیا میں یہ دعویٰ کیا جا رہا تھا کہ بھارتی ٹیم کی کٹ پر پاکستان کا نام نہیں لکھا جائے گا۔ تاہم، آئی سی سی کے اصولوں کے مطابق تمام ٹیموں کی جرسیوں پر میزبان ملک کا نام درج ہونا لازمی ہے، اور بھارتی کرکٹ بورڈ نے تصدیق کی تھی کہ وہ اس اصول پر عمل کرے گا۔
پیر کو جب آئی سی سی نے بھارتی کھلاڑیوں کی تصاویر شیئر کیں تو ان میں جرسی پر چیمپئنز ٹرافی کا لوگو اور میزبان ملک پاکستان کا نام درج تھا۔ یہ پہلا موقع ہے جب بھارتی ٹیم کی جرسی پر پاکستان کا نام شامل کیا گیا ہے۔
یاد رہے کہ گزشتہ برسوں میں بھارت نے ایشیا کپ 2023 کے دوران بھی اس حوالے سے تنازع کھڑا کرنے کی کوشش کی تھی، جس کی میزبانی پاکستان کے پاس تھی، تاہم ایشین کرکٹ کونسل نے اس میں میزبان ملک کا نام شامل نہ کرنے کی اجازت دی تھی۔
آئی سی سی چیمپئنز ٹرافی 19 فروری سے شروع ہو رہی ہے، جس کا افتتاحی میچ پاکستان اور نیوزی لینڈ کے درمیان کراچی کے نیشنل اسٹیڈیم میں کھیلا جائے گا۔ بھارت اپنے تمام میچز دبئی میں کھیلے گا، جبکہ 23 فروری کو دبئی میں پاکستان اور بھارت کے درمیان متوقع طور پر سب سے بڑا ٹاکرا ہوگا۔
