لاہور : آئی سی سی چیمپئنز ٹرافی 2025 میں شرکت کے لیے انگلینڈ کرکٹ ٹیم لاہور پہنچ گئی ہے۔ یہ چیمپئنز ٹرافی کے لیے پاکستان میں بین الاقوامی ٹیموں کی آمد کا سلسلہ جاری ہے۔ انگلینڈ کرکٹ ٹیم کپتان جوز بٹلر کی قیادت میں لاہور پہنچی، اور ٹیم کا 31 رکنی دستہ کھلاڑیوں اور اسٹاف سمیت براستہ دبئی لاہور پہنچا ہے۔
انگلینڈ کرکٹ ٹیم کے ہیڈ کوچ برینڈن مکیلم اور منیجنگ ڈائریکٹر رابرٹ کی بھی ٹیم کے ہمراہ پاکستان پہنچ گئے ہیں۔ انگلینڈ کرکٹ ٹیم اپنے گروپ میچ لاہور اور کراچی میں کھیلے گی۔
انگلینڈ ٹیم اپنا افتتاحی میچ 22 فروری کو روایتی حریف آسٹریلیا کے خلاف قذافی اسٹیڈیم لاہور میں کھیلے گی۔ انگلینڈ کا دوسرا میچ افغانستان کے خلاف 26 فروری کو لاہور میں شیڈول ہے، جبکہ انگلینڈ کا تیسرا اور آخری گروپ میچ یکم مارچ کو جنوبی افریقا کے خلاف نیشنل اسٹیڈیم کراچی میں ہوگا۔چیمپئنز ٹرافی کا آغاز 19 فروری سے ہو رہا ہے، جہاں افتتاحی میچ میں میزبان پاکستان اور نیوزی لینڈ کی ٹیمیں کراچی میں مدمقابل ہوں گی۔