لاہور : محکمہ موسمیات نے پاکستان کے مختلف علاقوں میں بارش اور بالائی علاقوں میں برفباری کی پیشگوئی کی ہے۔ اسلام آباد میں موسم سرد اور مطلع جزوی طور پر ابر آلود رہنے کی توقع ہے، جبکہ بھکر، لیہ، ڈیرہ غازی خان، بہاولپور، صادق آباد اور راجن پور میں بارش ہو سکتی ہے۔
کوئٹہ، زیارت، قلات، بارکھان، موسیٰ خیل اور ژوب میں بھی بارش کی پیشگوئی کی گئی ہے، جبکہ قلعہ عبداللہ، چمن، سبی، خضدار، پشین اور چا غی میں بارش کے ساتھ برفباری کا امکان ہے۔ بالائی علاقوں میں، چترال، دیر، سوات، بونیر، شانگلہ، مانسہرہ، کرم اور کوہستان میں بارش ہو سکتی ہے، جبکہ بٹگرام، وزیرستان اور گرد و نواح میں بارش اور برفباری کی توقع ہے۔
سندھ کے بیشتر اضلاع میں موسم خشک رہنے کا امکان ہے، تاہم مطلع جزوی ابر آلود رہنے کی توقع ہے۔ گلگت بلتستان میں چند مقامات پر بارش اور برفباری کا امکان ہے، جبکہ آزاد کشمیر میں موسم سرد اور مطلع جزوی ابر آلود رہے گا۔
